តាមរយៈការសិក្សាបានបង្ហាញថា ការផឹកភេសជ្ជៈប៉ូវកម្លាំងច្រើនពេក នឹងមានគ្រោះថ្នាក់យ៉ាងខ្លាំងដល់កុមារ និងក្មេងជំទង់។ផលប៉ះពាល់ដែលអាចកើតឡើងចំពោះការផឹកភេសជ្ជៈដែលមានសារធាតុកាហ្វេអ៊ីនច្រើនរួមមានស្ត្រូក បេះដូងដើរញាប់ និងអាចបង្កឲ្យស្លាប់ភ្លាមៗថែមទៀតផង នេះបើតាមការសិក្សាថ្មីៗ។
ក្រុមការងារមួយមកពីសាលាវេជ្ជសាស្ត្រនៃសាកលវិទ្យាល័យម៉ៃអាមី បានពិនិត្យមើលឡើងវិញពីទិន្នន័យដែលបានពីស្ថាប័ននានារបស់រដ្ឋ ក្រុមដែលពាក់ព័ន្ធ ព្រឹត្តិបត្រវិទ្យាសាស្ត្រ របាយការណ៍របស់ករណីសិក្សានីមួយៗ និងអត្ថបទទាំងឡាយនៅ... ក្នុងសារព័ត៌មានដែលមានប្រជាប្រិយ និងពាណិជ្ជកម្ម។មានសេចក្ដីរាយការណ៍ខ្លះថា ភេសជ្ជៈប៉ូវកម្លាំងខ្លះមានសារធាតុកាហ្វេអ៊ីនប្រាំដងច្រើនជាងភេសជ្ជៈធម្មតា។
តួយ៉ាងដូចជាករណីលោក សេល័រ (Mr. Sailor) អាយុ១៨ឆ្នាំដែលបានធ្លាក់ខ្លួនឈឺ និងសម្រាកក្នុងមន្ទីរពេទ្យចំនួនប្រាំថ្ងៃកាលពីឆ្នាំមុន ក្រោយពីពេលដែលបានទទួលទានភេសជ្ជៈប៉ូវកម្លាំងច្រើនពេក។លោកវេជ្ជបណ្ឌិតបានប្រាប់គាត់ថា សារធាតុកាហ្វេអ៊ីន ឬធាតុផ្សំស្រដៀងកាហ្វេអ៊ីនអាចជាបុព្វហេតុនៃជំងឺ។ លោកគ្រូពេទ្យបានបន្ថែមថា ក្មេងៗមិនគួរញ៉ាំភេសជ្ជៈច្រើនពេកទេដូចជា គោក្រហម (Red Bull)ជាដើម។
ភេសជ្ជៈប៉ូវកម្លាំង មានមុខលើទីផ្សារអាមេរិកកាលពីជាង២០ឆ្នាំមុន ជាផលិតផលដែលមានការរីកចម្រើន និងលក់ដាច់បំផុត។ បើតាមរបាយការណ៍ ការលក់នឹងមានទំហំទឹកប្រាក់ចំនួន ៩ពាន់លានដុល្លារក្នុងឆ្នាំ២០១១។
មជ្ឈមណ្ឌលត្រួតពិនិត្យជាតិពុលអាមេរិក (The American Association of Poison Control Center) បានចេញកូដកំណត់កាលពីឆ្នាំមុនដើម្បីរកឲ្យឃើញពីផលប៉ះពាល់។ ជាលទ្ធផល គេបានរកឃើញ៦៧៧ករណីបានកើតឡើងពីខែតុលា ដល់ខែធ្នូ និង៣១១ករណីត្រូវបានរាយការណ៍នៅក្នុងឆ្នាំនេះ។ រោគសញ្ញាដែលបានរាយការណ៍ក្នុងបញ្ជីរួមមាន អត្រាបះដូងដើរញាប់ គេងមមាល ឈឺទ្រូង សម្ពាធឈាមឡើងខ្ពស់ ជាដើម ប៉ុន្តែមិនមានស្លាប់ទេ។
លោកស្រីបណ្ឌិត ម៉ាស៊ី ស្នាយឌ័រ (Dr. Marcie Schneider) ជាពេទ្យឯកទេសខាងយុវវ័យនៅហ្គ្រីនវិច (Greenwich) រដ្ឋ Connecticut និងជាសមាជិកគណៈកម្មាធិការបណ្ឌិត្យសភាផ្នែកជីវជាតិចំណីអាហារ បានសរសើររបាយការណ៍នេះថាបានលើកឡើងពីក្ដីកង្វល់នានា។ គាត់បានបន្ថែមទៀតថា ភេសជ្ជៈទាំងនេះគ្មានសារៈប្រយោជន៍ និងក្មេងមិនគួរទទួលទាន។
