យោងតាមការរកឃើញនៅក្នុងការសិក្សាថ្មីមួយ បានបង្ហាញថា មនុស្សដែលធ្វើជាអ្នកគ្រប់គ្រងមនុស្សដទៃទៀតនៅកន្លែងធ្វើការងារ មានខួរក្បាលធំជាងមនុស្សធម្មតា។ ទំហំធំជាងនៃខួរក្បាលនេះ ជាពិសេសគឺទំហំនៃ hippocampus （ផ្នែកនៃខួរក្បាលដែលទទួលខុសត្រូវក្នុងការរៀន និងការចងចាំនៅវ័យចាស់) បានជួយបង្កើនសុខភាពខួរក្បាលបានល្អ នៅពេលដែលឈានដល់វ័យ ៨០ឆ្នាំឡើងទៅ។
ដើម្បីឲ្យដឹងថាតើអ្នកដែលមានបទពិសោធន៍គ្រប់គ្រងមានសុខភាពផ្លូវចិត្តល្អឬក៏អត់នោះ ក្រុមអ្នកស្រាវជ្រាវនៃសាកលវិទ្យាល័យ New South Wales （UNSW) បានជ្រើសរើសក្រុមមនុស្សដែលមានអាយុចាប់ពី ៧៥ឆ្នាំ ដល់៩២ឆ្នាំ ទាំងអ្នកមានបទពិសោធន៍គ្រប់គ្រង និងគ្មានបទពិសោធន៍គ្រប់គ្រង។
អ្នកដែលចូលរួមជាបុរស ភាគច្រើនជាអ្នកធ្លាប់ដឹកនាំក្នុងក្រុមហ៊ុន ខណៈដែលអ្នកចូលរួមជាស្រ្ដី ភាគច្រើនជាធ្លាប់គ្រប់គ្រងក្នុងផ្នែកពេទ្យ និងសាលារៀន។
ក្រុមអ្នកស្រាវជ្រាវបានធ្វើការស្គែនទំហំ hippocampus នៃខួរក្បាលរបស់អ្នកចូលរួមក្នុងការស្រាវជ្រាវនេះទាំងអស់។ ក្រោយពីក្រុមអ្នកស្រាវជ្រាវបានធ្វើការប្រៀបធៀបទំហំនៃ hippocampus ជាមួយនឹងបទពិសោធន៍នៃការគ្រប់គ្រងរួចមក ពួកគេបានរកឃើញថា មនុស្សដែលមានបទពិសោធន៍ជាអ្នកគ្រប់គ្រង ឬក៏ទទួលខុសត្រូវក្នុងកិច្ចការស្មុគស្មាញ គឺមានទំហំ hippocampus ធំជាងមនុស្សដែលមិនមានបទពិសោធន៍គ្រប់គ្រង។ ការរកឃើញនេះ គឺដូចគ្នា ទាំងបុរស និងស្រ្ដី។
លោកវេជ្ជបណ្ឌិត Michael Valenzuela ដែលជាអ្នកដឹកនាំការស្រាវជ្រាវនេះ បាននិយាយថា គាត់រួមនឹងសហការីរបស់គាត់បានរកឃើញនូវទំនាក់ទំនងយ៉ាងច្បាស់រវាងទំហំនៃ hippocampus និង ការទទួលខុសត្រូវក្នុងនាមជាអ្នកដឹកនាំ។
លោកវេជ្ជបណ្ឌិតរូបនេះបានបញ្ជាក់ពីក្ដីសង្ឃឹមថា ការរកឃើញនាពេលនេះ អាចនឹងជួយពន្យល់ពីរបៀបដែលអាចជួយឲ្យខួរក្បាលមានសកម្មភាព និងសុខភាពល្អ និងជៀសវាងជំងឺខួរក្បាល និងជំងឺរវើរវាយជាដើម។
