ផ្លែស្វាយគឺជាផ្លែឈើមួយប្រភេទដ៏ពេញនិយម ហើយវាមានដើមកំណើតតាំងពី៤០០០ឆ្នាំមុនមកម្លេះនៅប្រទេសឥណ្ឌា។ មិនត្រឹមតែផ្ដល់ឲ្យយើងនូវរសជាតិដ៏ឆ្ងាញ់ពិសារប៉ុណ្ណោះទេ ផ្លែឈើដែលងាយស្រួលរកមួយប្រភេទនេះ នៅមានប្រយោជន៍ជាច្រើនទៀត ដូចជា៖
១- ធ្វើជាឱសថបុរាណ
នៅក្នុងឱសថបុរាណចិន ផ្លែស្វាយ ត្រូវបានគេចាត់ទុកថាថាជាថ្នាំដ៏ស័ក្តសិទ្ធមួយប្រភេទ ដែលអាចព្យាបាលជំងឺខ្វះឈាមក្រហម, ជំងឺទល់លាមក ជំងឺក្អក ផ្ដាសាយ ចង់ក្អួត ពុលរលក និងជំនួយដល់ការរំលាយអាហារផងដែរ។
២- ផ្ទុកនូវវីតាមីនជាច្រើន
ផ្លែស្វាយ គឺជាឃ្លាំងស្ដុកទុកនូវវីតាមីនជាច្រើន ដែលមានដូចជាវីតាមីន A, B, C និងមានសារធាតុរ៉ែជាច្រើនទៀត ដូចជា ហ្វូស្វ័ររូស និងកាល់ស្យូម។ មិនត្រឹមតែប៉ុណ្ណោះទេ ផ្លែស្វាយ ក៏មានផ្ទុកនូវវីតាមីន K និងម៉ាញ៉េស្យូមផងដែរ។
ជាពិសេសជាងនេះទៀត ស្វាយ គឺជាផ្លែឈើដែលសម្បូរទៅដោលជាតិប៉ូតាស្យូម ដែលអាចជួយកាត់បន្ថយហានីភ័យនៃជំងឺសម្ពាធឈាមឡើងខ្ពស់។ ផ្លែស្វាយ ក៏ជាប្រភពដ៏ល្អបំផុតនៃ បេតាការ៉ូទីន Quercetin និង Astragalin ផងដែរ ដែលទាំងបីប្រភេទនេះ គឺជាសារធាតុប្រឆាំងនឹងអុកស៊ីតកម្មដ៏ប្រសើរ។
៣- ផ្លែស្វាយជួយកាត់បន្ថយគ្រោះថ្នាក់នៃជំងឺមហារីក
ផ្លែស្វាយមានផ្ទុកទៅដោយសារធាតុ Phenols ដែលជាសារធាតុប្រឆាំងអុកស៊ីតកម្មដ៏ខ្លាំង និងជាភ្នាក់ងារប្រឆាំងនឹងជំងឺមហារីក។ បន្ថែមលើនេះទៀត ស្វាយ ក៏មានផ្ទុកនូវ Pectin ដែលអាចជួយកាត់បន្ថយកម្រិតកូឡេស្ទេរ៉ូលទៀតផង។
ការសិក្សាជាច្រើនបានរកឃើញថា ការទទួលទាននូវអាហារដែលមានជាតិហ្វៃប៊ើច្រើនដូចជាផ្លែស្វាយ នឹងអាចកាត់បន្ថយនូវហានីភ័យនៃជំងឺមហារីកបាន។
៤- អត្ថប្រយោជន៍ផ្សេងទៀតជាច្រើនដូចជា៖
- ជួយព្យាបាយបញ្ហាតម្រងនោម ដូចជារលាកតម្រងនោមជាដើម។
- ផ្លែស្វាយ ក៏សម្បូរទៅដោយប្រភពនៃវីតាមីន A (បេតាការ៉ូទីន) វីតាមីន E និងសេលេស្យូម ដែលអាចជួយការពារប្រឆាំងនឹងជំងឺបេះដូង។
- ផ្លែស្វាយ គឺជាផ្លែឈើដ៏ល្អបំផុតក្នុងការទទួលទានក្រោយពីហាត់ប្រាណអស់កម្លាំងរួចមក ព្រោះវាអាចជួយបំពេញបន្ថែមនូវសារធាតុអំបិល និងថាមពលដែលបាត់បង់។
- ទឹកផ្លែស្វាយមួយពែង ជួយផ្ដល់ឲ្យយើងនូវ ២៥%នៃវីតាមីន A ប្រចាំថ្ងៃ ដែលជួយឲ្យភ្នែកយើងភ្លឺថ្លា
- ផ្លែស្វាយ មានផ្ទុកនៅ អាស៊ីត Glutamine ដែលអាចជួយបង្កើនការចងចាំបាន
- ផ្លែស្វាយ ១០០ក្រាម មានផ្ទុកនូវ កាឡូរី ៧៥ ដែលអាចជួយបង្កើនទម្ងន់ ចំពោះអ្នកដែលស្គមស្គាំង
- ទទួលផ្លែស្វាយ ជាប្រចាំ ធ្វើឲ្យមានស្បែករលោងស្រស់ថ្លា
- វីតាមីន E ដែលគេរកឃើញនៅក្នុងផ្លែស្វាយ ជាបង្កើតអ័រម៉ូនសិច និងបង្កើនថាមពលសិច ធ្វើឲ្យអ្នកទទួលបាននូវសិចដ៏ល្អប្រសើរ៕
សរុបមកវិញ ផ្លែស្វាយ ពិតជាមានប្រយោជន៍ច្រើនខ្លាំងណាស់ ដូច្នេះ អ្នកមិនគួរមើលរំលងវានោះទេ។
