តើអ្នកកំពុងតែរស់នៅក្នុងជីវិតមិនទាន់មានគូមែនទេ? អ្នកអាចរក្សាភាពនៅលីវរបស់អ្នកបាន ប៉ុន្ដែត្រូវប្រាកដថា ភាពនៅលីវនេះមិននៅជាមួយអ្នកជារៀងរហូតនោះឡើយ ព្រោះថាការសិក្សាថ្មីមួយរបស់អាមេរិក បានបង្ហាញថា ការរស់នៅតែម្នាក់ឯង អាចឈានទៅដល់ការប៉ះពាល់សុខភាព ហើយក៏នឹងអាចបណ្ដាលឲ្យស្លាប់មុនអ្នកដែលរៀបការ ប្រហែល១០ឆ្នាំ។
នៅក្នុងការសិក្សាដែលបានបោះពុម្ភនៅ American Journal of Epidemiology នេះ បានបង្ហាញថា អាយុសង្ឃឹមរស់ចំពោះអ្នកអត់មានគូស្រករ (ទាំងបុរស និងស្រ្ដីដែលមិនធ្លាប់រៀបការសោះ) មានភាពខ្លីជាងអ្នកមានប្ដី ឬប្រពន្ធ ហើយក្នុងនោះបុរសនៅលីវ មានផលប៉ះពាល់អាក្រក់ជាងស្រ្ដីនៅលីវ។
នៅក្នុងការសិក្សាដែលធ្វើឡើងដោយក្រុមអ្នកស្រាវជ្រាវមកពីសាកលវិទ្យាល័យ Louisville នៅ Kentucky សហរដ្ឋអាមេរិកនេះ បានបង្ហាញលទ្ធផលថា ហានីភ័យផ្នែកចិត្តសាស្រ្ដរបស់ស្រ្ដីដែលអត់ប្ដី មានខ្ពស់ជាងស្រ្ដីដែលបានរៀបអាពាហ៍ពិពាហ៍។ ចំណែកកម្លោះចាស់វិញ គឺកាន់តែអាក្រក់ថែមទៀត ដោយមាន ៣២ភាគរយ អាចនឹងស្លាប់មុនអាយុ បើប្រៀបធៀបជាមួយបុរសដូចគ្នាដែលបានរៀបការ។
អ្នកដឹកនាំការសិក្សានេះ គឺលោក David Roelfs ដែលជាសាស្រ្ដាចារ្យផ្នែកចិត្តវិទ្យានៃសាកលវិទ្យាល័យ Louisville បាននិយាយថា ការសិក្សាមុនៗមួយចំនួន ក៏បានបញ្ជាក់រួចមកហើយអំពីធាតុពិតដែលមនុស្សរស់នៅតែឯង មិនមានជីវិតល្អ (សុខភាព និងអាយុវែង) ដូចអ្នកដែលមានដៃគូជីវិតនោះដែរ ប៉ុន្ដែការសិក្សាថ្មីនេះ បានបង្ហាញច្បាស់ជាងមុន ថាមនុស្សអត់គូ គឺពិតជាគួរឲ្យអាណិត។
ដើម្បីចេញជាលទ្ធផលនេះ លោក Roelfs និងសហសេវិករបស់គាត់ បានធ្វើការសិក្សាទៅលើទិន្នន័យនៃមនុស្សប្រហែល ៥០០លាននាក់ ដែលមាននៅក្នុងការសិក្សាមុនៗចំនួន៩០ផ្សេងគ្នា តាំងពីជាង៦០ឆ្នាំ រហូតមកទល់បច្ចុប្បន្ន។
ក្រុមអ្នកស្រាវជ្រាវនេះ បានប្រើទិន្នន័យនៃមនុស្សដ៏ច្រើននេះ ដើម្បីធ្វើការប្រៀបធៀប ហានីភ័យនៃចិត្តសាស្រ្ដចំពោះមនុស្សនៅលីវ (កម្លោះចាស់ ឬក្រមុំសៅកែ) ជាមួយនឹងក្រុមអ្នកដែលរៀបការហើយ រួមបញ្ចូលទាំងពោះម៉ាយ និងមេម៉ាយ និយាយជារួម គឺឲ្យតែធ្លាប់រៀបការ។
លទ្ធផលដ៏គួរឲ្យរន្ធត់សម្រាប់អ្នកអត់មានគូស្រករបានបង្ហាញឡើង ក្រោយពីក្រុមអ្នកស្រាវជ្រាវទាំងនេះ បានធ្វើការវិភាគរួចរាល់ ពោលគឺបុរសដែលអត់ប្រពន្ធ អាចស្លាប់មុនអ្នកដែលមានប្រពន្ធដល់ទៅ១៧ឆ្នាំ។
មិនទាន់មានការរកឃើញពីហេតុផលនៃការរកឃើញនេះនៅឡើយទេ ប៉ុន្ដែក្រុមអ្នកស្រាវជ្រាវដដែលនេះ បានជឿជាក់ថា នេះប្រហែលបណ្ដាលមកពីកត្តា សង្គម និងសេដ្ឋកិច្ច ដោយសារតែ អ្នកនៅលីវមានបញ្ហាសុខភាពខ្សោយជាង ឬដោយសារខ្វះជំនួយការប្រចាំជីវិត និងអាចបណ្ដាលមកពីចំណូលតិច។
